Cerpen Mabasa Bali - Jayaning Wijaya

 

JAYANING WIJAYA

Olih : Ni Wayan Dewinta Tirta Sintyawati

 

Makuug suaran motore saking arep kapireng ngantos genah parkir sane wenten ring belakang sekolah. Samian sampun uning sapasira sane rauh, sekadi nyingakin Tika Pagraky konser, murid-muride magrudugan padengok saking jendelan kelase. Sane rauh boya ja artis terkenal, sakewala ia sang sane kaajumang ring sekolah. Nggih, nika suaran motor saking iring-iringan tim olimpiade sekolah sane kairingin olih sajebag pengurus OSIS SMA Sanathana Dharma. Nenten lian sane kairingin punika, sane prasida ngarebut jayanti olimpiade, tuah ia I Wijaya Chandra, manggala OSIS SMA Sanathana Dharma. Sekadi pesenganne, Wijaya setata jayanti ring sekancan lomba sane ia sarengin. Sisya kesayangan guru ring sajebag SMA Sanathana Dharma, dados idola utamanipun yening wenten sisya anyar ring sekolah punika. Nenten meweh yening pacang ngrereh Wijaya Chandra, sapasira sane madue pengawak tegeh kedas, kenyeman manis maimbuh sujenan tur magelang rudraksha, nika pastika Wijaya Chandra. Samian sane neket ring awakne Wijaya Chandra kerasa sempurna, nenten wenten cacat saking perawakannyane, pantes sekadi pesenganne Chandra sane setata mesunar. Nenten tuah paras lan kawidyannyane sane dados kautaman Wijaya Chandra, sakewala saking parilaksanannyane sawai-wai. Wijaya Chandra, kapin dados idola sajebag sekolah, nenten taen kapireng ia melaksana corah napi malih ngalahin dharma. Ring galah sekolah, napi malih sampun SMA, pastika sampun akeh anak bajang lan teruna sane nyalin paiketan matresna kasih. Sakewala lian sareng Wijaya Chandra, ngantos pun makiken kelas roras nenten taen kapireng desus orta ia matresna kasih sareng anak ring sekolah, keto masih ring pasisi.

Rikalaning nuju rahinan Purnama, ring SMA Sanathana Dharma pastika ngelaksanayang pangubhaktian ring parahyangan sekolah. Lumrahnyane pastika sampun sisya sane dados OSIS sane nyayagayang samian piranti sane pacang kaanggen rikalaning muspa ring galah Purnamane punika. Samian OSIS ngeranjing ka sekolah ring galah empat sore, nanging Wijaya Chandra sampun wenten ring sekolah saking galah tiga sore. Pinaka manggala organisasi pastika ia nyayagayang kapertama, sekadi galah sane sampun kalintang masih asapunika. Wijaya Chandra memargi ka parahyangan sambil nyangkil keranjang wadah piranti tirta sekadi gelas, asaban cenana miwah menyan lan pengetisan tirta. Makesyab ia Wijaya Chandra, sagetan sampun wenten asiki diri ring parahyangan, anak luh putih kedas marambut panjang nganggen kebaya putih susu. Heran manah Wijaya Chandra, polih matepuk sareng anak punika, waktu nika seledetne tawah pisan, makenyem tipis sareng Wijaya Chandra nanging Wijaya Chandra nenten uning sapasira anak punika. Pastika nenten pengawak OSIS, nanging pastika masekolah ring SMA Sanathana Dharma.

“Om Swastyastu”, ucap Wijaya Chandra sinambi ngeranjing ka parahyangan. Masih nenten sautina sareng anak punika, ia tuah nyeledet kidik tur masebeng sinis. Wijaya Chandra nenten nyangetang sapunapi parisolah anak punika, nanging nenten Wijaya Chandra wastane yening nenten tetep becik parisolahnnyane yadiastun sapunapi anak lian tekening ia. “Adik kelas dasa nggih?”, keto pamesun munyine Wijaya Chandra, nenten masih wenten penampen saking anak luh punika. Anak luh punika tetep seleg negak ring penataran parahyangane sambilang nguntul. Wijaya Chandra milu masih nguntul, makeneh napike ia wenten iwang sareng anak punika, sakewala diastun sampun kainget-ingetang Wijaya Chandra nenten taen merasa wenten iwang sareng anak luh punika diwau. “Sira pesengane, Gek?”, malih Wijaya Chandra metaken teken anak luh punika. Mangkin anak luh punika majujuk, nyingakin panyingakan Wijaya Chandra wenten dasa detik, lantas makenyem lan kituk-kituk saha mesu saking parahyangan. Wijaya Chandra nenten makutikan, sekadi patung ia bengong makelo, lantas teka timpale namplak lengene mara Wijaya Chandra suud ngelamun. Heran ia Wijaya Chandra, adi tumben timpale teka selidan, biasannyane nak setata ngaret. “Yeee nak rainan adane, harus rajin! Ne nak be miken jam pat se mase”, keto pesautne timpale ento. “Lan sube gaenin ne dadi gaenin!”, keto ajakine Wijaya Chandra teken timpale ento, “Lan!”.

Buin manine, rikalaning samian guru lan sisya SMA Sanathana Dharma ngelaksanayang pangubhaktian Purnama, irika Wijaya Chandra kilang-kileng ngrereh anak luh ane ia cingakin dibi ring parahyangan. Biasannyane anggota OSIS lianan sane matugas nyalanang tirta, tumben Wijaya Chandra nagih bareng nyalanang tirta, kerana biasannyane manggala OSIS nampingin pemangku sane mimpin pangubhaktian tur madampingan sareng kepala sekolah lan dewan guru. Nenten lian tetujonnyane I Wijaya Chandra, tuah ngrereh anak luh sane dibi, kerana saking dibi ngantos mangkin nenten lempas saking sirah I Wijaya Chandra sapunapi anak ento nyingakin ia, maimbuh kenyemne sane tetep mesarat ring ingetan I Wijaya Chandra. Saha mesambilan ngetisin sisya sane lianan, panyingakan Wijaya Chandra setata ngrereh ring dija anak luh ento magenah. Ngantos miken samian sisyane sampun polih tirta, dereng masih ia Wijaya Chandra nyingakin anak luh dibi, ngantos ia makeneh yening anak luh punika nenten sareng sembahyang ring parahyangan. Mebalik sampun ia Wijaya Chandra ka jaba tengah parahyangan, saget maklieb ring sisi kaja, ring paling bucu, irika wenten anak luh sane dibi cingakin olih Chandra. Sakewala anak luh punika sampun mawija, nika mawinan nenten karereh olih Chandra. Sakewala ring pejalan nuju ka parahyangan, anak luh punika tetep nyingakin Chandra, mangkin nenten nganggen seledetane sane mangan sekadi silet, nanging anak luh punika nyingakin aji penyingakane sayu lan makenyem tipis ring sisin cangkemne. Kenyeman punika sahasa ngaenang tangkah I Wijaya Chandra ngetug, cangkemne cikep ten mresidayang mamunyi tur panyingakanne nenten prasida lempas saking anak luh punika.

Sewusan persembahyangan ring parahyangan, mangkin samian OSIS ma reresik ring parahyangan, lan samian alat sane masisa kasimpen malih ring gudang sane genahnyane ring samping ruang OSIS. Sesampune samian resik, mawali pun makejang anak OSIS ka kelase soang-soang mangda polih mengasuh kadung jam pelajaran mapotong santukan wau wenten persembahyangan. Samian ka kelase soang-soang, sajabaning I Wijaya Chandra, santukan ia seneng teken kasunyian, ia seneng pisan nelahang galahe ring ruang OSIS, punika mawinan nenten taen katepuk ring kelas yening sampun galah istirahat. Sedeng itep ia Wijaya Chandra ngotak-atik komputer OSIS, makesyab ia mirengang wenten munyin gelas belah. Munyin gelas belah punika saking ruangan samping, inggih punika gudang. Mara lantas ia malaib ka gudange punika, saget buin makesyab ia Wijaya Chandra, kerana ring ruangan punika wenten anak luh ane ia alihin. “Nak kenapi, Gek?!”, ngetor munyine I Wijaya Chandra nakenin anak luh punika. Anak luh punika tetep siep tan pasuara. Sakewala wau Wijaya Chandra nelektekang limane anak luh punika metatu, getihne ngalir ulian kena belahan gelase punika. Nyingakin anak luh punika magetih, langsung I Wijaya Chandra ngatehin ka UKS. Irika ring UKS tuah padaduanan, ening pisan, I Wijaya Chandra iteh ngubadin limane anak luh sane metatu punika. “Aduhh!!!”, saking pertama kacunduk wau mangkin Chandra mirengang suaran anak luh punika. “Tahan nggih, bersihin malu mara jangin betadine, emangne kenape adi bise kanti belah gelase tur ngenanin tangane?’, keto I Wijaya Chandra nyuariang metaken. “Suksma nggih bli pun ngewantu titiang”, tuah amonto pesautne anak luh punika pun ngaenang tangkahe Chandra kadi wusan olahraga lari.

“Titiang Saras, Purnama Saraswati, sisya kelas dasa anyar”, tan pasangkan anak luh punika nyambatang wastane ka Chandra, lantas sautine “Nggih, wastan bli ...”, “Nggih Bli tiang pun uning, sira sih ring sekolah niki ten uning, Bli Chandra kan?”, konden peragat Chandra ngomong pun sautine teken anak luh punika. I Wijaya Chandra ten nyidang mesaut apa-apa, ia tuah makenyem tipis saha naenang ketug tangkahe. Wusan unduke ring UKS punika, Saras lan Chandra ngangsan paek. Makadadua sesai mecapatan, tur nenten kapah masih katepuk melajah bareng-bareng ring perpustakaan utawi taman sekolah. Nenten prasida kakelidin, Saras masih anakne dueg pisan, wau siki semester pun mresidayang polih jayanti ring kelas, maimbuh Saras sesai nyarengin lomba lan olimpiade, nika ngeranayang Saras lan Chandra sesai matepuk. Timpal-timpale ring kelas sampun makasami uning, nenten ring kelas manten, nanging samian sisya ring SMA Sanathana Dharma sampun uning. Wenten sane sareng bagia, wenten sane sebet (utamanipun sisya luh sane seneng sareng Chandra), tur wenten masih sane makesyab tur nenten percaya (santukan Chandra sekadi es batu, kharismatik lan paket komplit nanging ten taen nanggepin anak luh ane demen teken ia). Galah mejalan kadi pejalan angine, paiketan Saras sareng Chandra ngangsan rumaket, napi malih buin aminggu pacang kalaksanayang olimpiade lan makakalih dados satu tim lomba ngewakilin SMA Sanathana Dharma.

Sampun nampek ring pinanggal lomba, mangkin samian tim olimpiade ngelaksanayang matur piuning ring parahyangan sekolah. Wusan mebhakti, pun samian tim sane lianan mewali, irika tuah masisa Chandra lan Saras manten. Ajak dadua negak ring bale tur magesah-gesah sinambil ngantosang liang manah lakar mewali. “Saras, yen misal mani iraga menang utawi kalah, engken asane?”, keto petakonne Chandra. “Yen misalne menang, astungkara pasti ngaturang suksma, yen kalah nah kanggeang, engkenang men”. Saget mageser tegakane Chandra maekin Saras tur setengah kisi-kisi, “Yen misal menang, Bli kal nyambatang tresna ka Saras ring arep lapangan rikala upacara saha pengesahan piala jayanti iraga, nyak?”. Saras ten mesaut, peliatne nguntul tur ten mresidayang naenang ngetug kenehne sinambi makenyem tipis ane setata ngaenang Chandra nenten prasida ngelempas Saras saking manahne. Wusan punika Chandra ngisiang tanganne Saras lan ngajakin mewali ka umahne soang-soang. Ring wengine, makadadua nenten mresidayang sirep ngenehang lombane buin mani. Kringgg..... Kringggg.... Kringggg...... suaran HP ne Saras ngejutin ia ane sedeng ngelamun.

“Hallo”

“Hallo, Swastyastu”

“Hehehe...Swastyastu jegeg bulan”

“Hehe, napi Bli?”

“Esing, sing nyidang tidur nok, tetep kene sebilang lakar lomba”

“Ae iyang masih keto Bli”

“Sakewala ane jani Bli merase aneh, takut asane”

“Ah sing ade kenten Bli, positif thingking gen Bli, pasti bisa!”

“Ah kene, pasti ulian mani lombane ngajak Saras, makane nambah ketug hehehe”

“Bih Bline bise gen”

“Hehehe da nae memarak keto pipine”

“Ah esing, iyang kal sirep be Bli”

“T-tapi Bli nu ....”

---tutt...tutt...tutt...---

Buin manine, semengan pisan Wijaya Chandra nyemput Saras ka umahne menekin sepeda motor, sesampun mapamit ia I Saras, wau lantas makadadua memargi ka sekolah. Ring margi, makadadua mesambilan ngorta lan makedekan. Sampun paek saking sekolah, sakewala Chandra lan Saras makesyab, sagetan makelieb kuluk makakalih nyujuh motore Chandra. GEDUBRAK!!!!! Makesyab manahe ajak dadua, tan mresidayang kakelidin sakit di jalan, ulung makadua uling motore, Chandra lan saras mental mejohan sareng motore. Irika Chandra sane dumunan sadar, raris nyagjagin Saras sane enu ring margane. “Saras! Saras! Yuk bangun Saras, mai jalan ka sekolah pang ten kalahina teken tim lombane!”. Ngedat lantas ia Saras, laut memargi makakalih ka sekolah yadiastun Chandra lan Saras ngerasayang sakit tan sida ban naenang. Nganteg ring sekolah, sagetan samian anake pada ngeling-ngeling. Kalih ipun ngaukin timpal-timpale lan guru sane wenten irika, nanging ten wenten sane kerungu. Samian anake malaib ka sisi gerbang, kerana merasa wenten sane ten patut, Chandra lan Saras lantas sareng nyingakin. Irika katepuk kalih anak mabaju SMA buat teken ambulane, Chandra lan Saras makesyab, anake ento mesib teken ia ajaka dadua. Makadadua pun panik, maimbuh Chandra nyingakin Saras ngeling sigsigan, prejani magetih-getih, Saras ngelemet lan kaabin olih Chandra, irika Chandra nenten prasida naenang tangise. Chandra ngidih tulung sambil sigsigan, kewala nenten wenten sane mirengang, keneh Chandra pun ten karuan. “SARASS!!!”, punika Chandra makaikan, sakabedik Saras ilang saking pabinan Chandra.

 “Punika ipidan tiang nenten merasa teken dewek tiange sane sampun kelangan raga, kelangan Adi lan kelangan tresnan tiange! Kewala mangkin malih ketemu Adi, iriki ring SMA Sanathana Dharma”, punika ucap Chandra sane negak di samping Laras.

 “LARAS!!!”

Makesyab ia Laras, wenten timpal-timpal kelase teka namplak lengene, lantas wau nenten wenten duang detik ia madengokan ka timpale, anak tawah ane ngaku maadan Chandra pun ilang tan sinah pemargine. Paling ia I Laras ngrereh Chandra, rikala katepuk ring bucu sisi kaja genah anake nunas tirta, irika Chandra negak makenyem, nanging makelo-kelo ngetel getih saking rambut nuju ka pipinyane. Irika Laras makaikan ngelantas pingsan.

“Laras! Laras! Nak kenape ne adi bise kekene?!”

“Aduh tusing nawang, nyen ia busanan kaukina? Sira ento Chandra?!”

“Aduh ayuk aba malu ka UKS apang maan Laras mategtegan!”

“Lan! Lan!”

Keto timpal-timpale pada jejeh lan tusing ngerti teken Laras ane setata aneh. Laras abana ka UKS olih timpal-timpale punika, disubane sadar, malih Laras nepukin Chandra sane magetih-getih. Malih Laras makaikan kewala encolan kaelingang teken timpale lan petugas UKS sane wenten irika. “Bapak, Ibuu tulungin Chandra, Chandra magetih!!!”, keto pamunyine Laras. Mirengang wenten sane nyambat adane Chandra, wenten penjaga sekolah lan guru-guru sane ruangannyane nenten doh saking UKS nika langsung magrudugan. “Laras sesai ia buka kene Pak, Buk. Sesai ngomong pedidine, kewala niki paling parah kerana ia nyambat wenten getih getih! Titiang lan semeton ring kelas masih ten uning, Laras sesai nyambat sane mawasta Chandra, ring kelas nenten wenten sane mawasta Chandra”, keto pesaut timpale Laras. “Nggih, ring sekolah niki mula ten wenten sane mawasta Chandra, kerana tuah wenten asiki Chandra lan nenten pacang sida kaganti!”, punika pesaur silih sinunggil guru. Nenten perlu galah makelo, gurune nika saling matolihan tur angkihane baat, lantas ngeraos, “Wijaya Chandra, niki Purnama Larasati, boya ja Purnama Saraswati, mewali Chandra, Chandra patut polih genah sane becik!”